ಜೀವನ್ಮಿತ್ರನಿಗೆ

ಆಗ ನನಗಿದ್ದದ್ದು ಬರಿಯ ಕುತೂಹಲ....
ಕುತೂಹಲಕ್ಕೆ ಪ್ರೇಮವೆಂದು ಕರೆಯಬಹುದೇ?
ಪ್ರೇಮ ಕುರುಡೆನ್ನುತ್ತಾರೆ, ನಿಜವೇ!?
ಆದರೆ ಕುತೂಹಲಕ್ಕೆ ಮೈಯೆಲ್ಲ ಕಣ್ಣು - ಕಿವಿ - ಮೂಗು....
ನಾನು ನಿನ್ನೆಡೆಗೆ ನೋಡಿದ್ದು ಬೆರಗಿನಿಂದ;
ಕೋರೈಸಿದ ಬೆಳಕಿಗೆ ಕಣ್ಣು ಮುಚ್ಚಿತ್ತು.
ಮತ್ತೆ ಮತ್ತೆ ದ್ವಂದ್ವಗಳು,
ಪ್ರೇಮ ಕುತೂಹಲಗಳೆರಡೂ ಹೊಂದಿಕೊಳ್ಳುತ್ತಿಲ್ಲ;
ಕುತೂಹಲ ಕಿವಿ ನಿಮಿರಿಸಿ ಕುಳಿತಿದೆ....
ಕೇಳಿದ್ದು ಮಾತಿಗಿಂತಲೂ ಲಬ್ ಡಬ್... ಹೃದಯ ಬಡಿತ!
ಕುತೂಹಲದಿಂದ ಆಘ್ರಾಣಿಸಿದೆ
ಬರಿ ಮೈಯ ಗಂಧ - ಸುಗಂಧ!
ನಾನೊಪ್ಪಿಕೊಂಡೆ ಆ ಕ್ಷಣವೇ...
ನನ್ನ ಪ್ರೇಮ ಕುತೂಹಲವನ್ನೂ ಮೀರಿ ನಿಲ್ಲುತ್ತದೆ...
ಜೀವನಪೂರ್ತಿ ನಿನ್ನನಪ್ಪಿಕೊಂಡೆ...
ನಿನ್ನ ಅಂತರಂಗ ನನಗಷ್ಟೇ ತಿಳಿಯುತ್ತದೆ.