ಯೋಚನೆಗೆ ಧ್ವನಿಯಿಲ್ಲ ಎಂದದ್ದು ಯಾರು?

ನಾನು ದೂರ ಸರಿದಷ್ಟೂ ನೀನು ಹತ್ತಿರವಾಗುತ್ತಿ
ನಿನಗೆಲ್ಲಿಂದ ಬಂತೀ ಆಕರ್ಷಣ ಶಕ್ತಿ?

ನೀ ಹತ್ತಿರ ಬಂದಷ್ಟೂ ಕೋಪ ನನಗೆ,
ಸತಾಯಿಸಲೆಂದಲ್ಲ; ಏನೋ ಜಡತೆ!

ನಿನ್ನ ಪ್ರೀತಿ ಕೋಪವನ್ನೂ ಮರೆಸುತ್ತದೆ...
ನಿನ್ನೊಂದಿಗೆ ನಾ ಕೋಪಿಸಿಕೊಂಡದ್ದಾದರೂ ಹೇಗೆ?

ನಿನ್ನ ಮಾತು ಮೀರಬಾರದು ; ನೀ ಹೇಳಿದ್ದಲ್ಲ!
ನನಗೆ ನಾನೇ ಹಾಕಿಕೊಂಡದ್ದು ; ನಿಯಮ!

ನಾವಿಬ್ಬರೂ ಜೊತೆಯಲ್ಲೇ ನಡೆಯುತ್ತಿದ್ದೇವೆ,
ಎಣಿಕೆ ತಪ್ಪೆನಿಸಿದರೂ , ನಮಗಿಬ್ಬರಿಗೂ ಸೇರಿ ಎರಡೇ ಕಾಲು!

ನೀನು ಯೋಚಿಸಿದ್ದು ನನಗೂ ಕೇಳಿಸುತ್ತದೆ,
ಯೋಚನೆಗೆ ಧ್ವನಿಯಿಲ್ಲ ಎಂದದ್ದು ಯಾರು?