ಮೌನ - ಸಾಗರ

ಭೂಮಿಯ ಮೌನಕ್ಕೆ
ಆಕಾಶ ಮಾತಾಗಿದೆ...
ಸುರಿವ ಮಳೆಯಂತೆ
ನೆನಪುಗಳೂ...
ಗುಡುಗಿನಬ್ಬರವಿಲ್ಲ, ಹಿತವಾದ ಮಾರುತ..
ಹನಿ‌ಹನಿಯಲ್ಲೂ ಅಲ್ಲೆಲ್ಲೋ ನಿನ್ನ ಕಾಯುತ್ತ ಕೊಡೆಯಿದ್ದರೂ ನೆನೆದ ನೆನಪಿನ ತಂಪು ಮಣ್ಣಿನ ಕಂಪು..
ಕಣ್ಣು ನೆಟ್ಟಷ್ಟೂ ದೂರ ಸಮುದ್ರ,
ಸಾಗರದಲೆಗಳಲಿ ಕಳೆದು ಹೋಯಿತೇ
ನೂರು ನೋವುಗಳು..‌
ತೆರೆ ತೆರೆದು ತಬ್ಬಿ ನಿಂತಿತೇ ಮೌನವ
ಮೀರದಂತೆ ಕಣ್ಣೀರು ಕಾಣದಂತೆ...

ಮೌನ ಬಿಂಬಕ್ಕೊಂದು ಮಾತು

ಮನದ ಕನ್ನಡಿಯಲ್ಲಿ
ಕಂಡ ಬಿಂಬ
ಮರೆಯಾಗದೆಂದೂ...
ಬದಲಾಗದೆಂದೂ...
ಮೌನವೇ ನನ್ನ ಬಳಿ
ಮಾತಾಗುವುದು...
ಮೌನಕ್ಕೆ ಅರ್ಥ ಹುಡುಕಲಾರೆ
ಮೌನ ಮೀರುವ ಮುನ್ನ
ನಕ್ಕು ಬಿಡು ನನ್ನ ನೋಡಿ...
ನಕ್ಕಂತೆ ನಟಿಸದಿರು..
ದುಃಖಕ್ಕೂ ಮೌನಕ್ಕೂ ನಂಟು ಬಹಳ!
ಎರಡು ದೋಣಿಗಳು ಜೊತೆಯಾಗಿ
ಚಲಿಸಿ ಗಮ್ಯವನು ಸೇರಿದಂತೆ...
ಬಾಳ ಪಯಣದಲು ಸಹಜವೀ ಅಂತರ
ಮೌನ...ಪರಿತಾಪ...