*ರುಕ್ಮಿಣಿಯ ಸ್ವಗತ*

ರಾಧೆ ನೀನೇ‌ ಪುಣ್ಯವಂತೆ
ರಾಸಗೀತೆ ಹಾಡಿದೆ.
ಆತನಿಂದು ಕಾರ್ಯನಿರತ
ಪ್ರೀತಿ ಮಾತು ಬತ್ತಿದೆ.


ರಾಗ ಮಿಡಿದ ಬೆರಳಲಿಂದು
ಚಕ್ರ ಬಂದು ನೆಲೆಸಿದೆ
ಪ್ರೇಮಧಾರೆ ಗೈಯುತಿದ್ದ
ನೇತ್ರ ಜಗವನಳೆದಿದೆ

ಹೆಗಲ ತುಂಬ ಜಗದ ಭಾರ
ಯುದ್ಧ ಕುದುರೆ ಕೆನೆದಿದೆ
ನೆನೆವನೇಕೋ‌ ಯಮುನೆತೀರ
ಕೊಳಲು ನಾದ ಮರೆತಿದೆ

ಕನ್ನ ನಿನ್ನವನೆಂಬ ಭಾವ‌
ನೂರು ನೋವ ಮರೆಸದೇ?
ಇದ್ದೂ ಇರದ ಜೀವದೊಳಗೆ
ಅವನ ಚಿತ್ರ ಕದಲದೇ?
~~~~~~~~
ಸಂಧ್ಯಾ ಕಾನತ್ತೂರು

ಅವನ ಪ್ರೇಮದ ಹಾಗೆ! (೨೦೦೧ ರ ಕವನ)

ಟಪ್ ಟಪ್ ಟಪ್.......
 ಹನಿಮಳೆ,
ಅವನ ಪ್ರೇಮದ ಹಾಗೆ!
ಅಲ್ಲಿ ಭೋರ್ಗರೆತ,‌ ಆವೇಶ ಇಲ್ಲ.
ಬರಿಯ ಮಣ್ಣ ವಾಸನೆಗೆ
ಮೂಗರಳಿಸಿ ಆಸ್ಸುವಾದಿಸುವ‌ ನಿರಾಳತೆ....

ಸಂಪಿಗೆ ಮರದೆಲೆಗಳ ಮಾತ್ರ ಅಲುಗಾಡಿಸಿದೆ....
ಮೆಲುಗಾಳಿ,
ಅವನ ಪ್ರೇಮದ ಹಾಗೆ!
ರೆಂಬೆ ಕೊಂಬೆ‌ ಕಾಂಡವನ್ನೇ ಕುಲುಕಿ
ಅಸ್ತಿತ್ವವ ಮರೆಸುವುದಿಲ್ಲ
ತೇಲಿಬಂದ ಸಂಪಿಗೆಯ ಕಂಪಿನಲಿ
ಅವನ ಪ್ರೇಮ ಗಾಢವಾದಂತೆ.....

ಕುಹೂ...ಕುಹೂ...ಕುಹೂ....
ಚೈತ್ರದಲಿ ಕೋಗಿಲೆಯುಲಿತ
ಅವನ ಪ್ರೇಮದ ಹಾಗೆ!
ಕಾರ್ಖಾನೆಯ ಸೈರನ್ನಿನ ಕೂ.....ವಿನ
ಪರಿಯಲಿ ಬೆಚ್ಚಿ ಬೀಳಿಸುವುದಿಲ್ಲ...
ಜೋಗುಳ ಹಾಡಿನ ಕೊನೆಯ ಸಾಲಿನ
ಜೋ....ಜೋ.....ಜೋ...

ರಾಧೆಯ ಸ್ವಗತ
ಅದೇ ಯಮುನೆ‌ ಅದೇ ಕೊಳಲು
ಇಂದು ಮೌನ ತಳೆದಿವೆ.
ಮನದ ನೋವು,ಬಯಕೆ ಕಾವು
ಹೃದಯ ಅವನ ‌ಕಾದಿದೆ.

ತುಳಸೀ ಮಾಲೆ - ಗೋವು ಶಾಲೆ
ಕನ್ನನಿರದೆ ಸೊರಗಿದೆ
ಮಧುರ ಗೀತ - ರಾಸ ಕುಣಿತ
ಎಲ್ಲ‌‌ ಸ್ಥಬ್ದವಾಗಿದೆ

ಬಂದೇ ಬರುವೆನೆಂದ ವಚನ
ಮನದಿ ನಿತ್ಯ ಧ್ವನಿಸಿದೆ
"ನಾನೇ ನೀನು , ನಿನ್ನಲಿರುವೆ"
ಬರಿಯ ನೆನಪು ಉಳಿಯಿತೇ!?
~~~~~~~
ಸಂಧ್ಯಾ ಕಾನತ್ತೂರು.