ನೆನಪು - ಚಿತ್ತಾರ

ಯಾರದೋ ಉಸಿರು
ನನ್ನ ಬಸಿರೊಳಗೆ ಕಾಡುತಿಹುದೇಕೆ?
ಇರುಳ ತಮವದು ಹಗಲಲೂ ನುಸುಳಿ ನುಗ್ಗುತಿಹುದೇಕೆ?
ಅರ್ಥವಾಗದ ಮೌನ
ಕಿರುನಗೆಯ ಅಣಕ,
ಸುಡುವುದೀ ಬದುಕ...
ನೆತ್ತಿಗೇರಿದ ಭಾನು;
ಹೊನ್ನಶೂಲದ ಮಾತುಗಳಲ್ಲಿಲ್ಲ ದುಡುಕು!
ಕತ್ತಲೆಯ ಮಬ್ಬು
ಕವಿಯುತಿಹುದಿಲ್ಲಿ,  ಬಾನ ಬಾಂದಳದಲ್ಲಿ....
ಉರಿವ ಸೂರ್ಯಗೆ ಗ್ರಹಣ ಹಿಡಿದಿಹುದು ಮಧ್ಯಾಹ್ನದಲಿ...
ಇಳಿದ ಈ ಸಂಜೆಯಲಿ
ತಾರೆ ಮೂಡದ ಆಗಸವಿದೆ...
ಕತ್ತಲಾವರಿಸಿದೆ
ಬಣ್ಣವಿರದ ಕುಂಚದಲಿ
ಮೋಡ ಚಿತ್ತಾರ ಬಿಡಿಸಿದೆ!