ಮನದ ಮುಂಜಾವು

ಮರೆತು ಹೋದ ಮಧುರ ಗಳಿಗೆ
ಮರಳಿ ಬಂದಿದೆ ಇಲ್ಲಿಗೆ .....
ಹಿಮದ ಹಾದಿಯ ಮುಸುಕು ಸರಿಸಿದ
ಉಷೆಯ ಕಿರಣಕೆ ಮೆಲ್ಲಗೆ ....

ಸರಿದ ಪರದೆಯಾಚೆಗೆನಿತು ಚಂದ
ಭಾವ ಸ್ಫುರಣದ ಹೂರಣ
ಹಿಮಾಚ್ಛಾದಿತ ದಾರಿಯದ್ದಕು
ನಿನ್ನ ನೆನಪಿನ ಸಿಂಚನ

ನಿನ್ನ   ಕಿವಿಯ ಓಲೆ ಕಲ್ಲು
ಚಿಮ್ಮಿ ಮೇಲಕೆ ಹೋಯಿತೇ ?
ಚಂದ್ರನಿಂದ ಕೊಂಚ ದೂರದಿ
ಬೆಳ್ಳಿ ಚುಕ್ಕೆ ಎನಿಸಿತೆ !....

ಹಾದಿ ಬದಿಯಲಿ ನಗುತ ನಿಂತ
ಮುದ್ದು ಮುಖದ ಸುಮಗಳೇ ,
ಅರಳಿ ನಿಂತ ನಿಮ್ಮ ಹೆಸರ
ನನಗೂ ಒಮ್ಮೆ ಹೇಳಿರೆ...

ನನ್ನದಲ್ಲದ ನಿನ್ನೆಗಳ
ಹಿಂದಿರುಗಿ ನೋಡದೇ
ನಡೆವೆ ಮುಂದೆ ಬೆಳಕಿನೆಡೆಗೆ
ಕಲ್ಲುಗಳನು ಎಡವದೇ ...